रत्नागिरी : जागतिक दिव्यांग दिनानिमित्ताने तीन डिसेंबर २०१९ रोजी रत्नागिरीत समावेशित एकता दौड आयोजित करण्यात आली होती. ती अत्यंत उत्साहात पार पडली. मूकबधिर, दिव्यांग आणि मतिमंद शाळांमधील विद्यार्थ्यांबरोबरच सर्वसामान्य विद्यार्थीही एकता दौडीत सहभागी झाले होते.
रत्नागिरीतील आविष्कार संस्थेची श्यामराव भिडे कार्यशाळा आणि सौ. सविता कामत विद्यामंदिर, तसेच कै. के. प. अभ्यंकर मूकबधिर विद्यालयाच्या एकत्रित सहभागाने ही समावेशित एकता दौड आयोजित करण्यात आली होती. दिव्यांग विद्यार्थ्यांना स्वतंत्र शाळांच्या ऐवजी समाजाच्या मुख्य प्रवाहात समाविष्ट करून घेण्याकरिता इतर सर्वसामान्य विद्यार्थ्यांसोबत शिक्षण घेता यावे, यासाठी त्याच शाळांमध्ये त्यांना समाविष्ट करण्याचे शासनाचे नवे शैक्षणिक धोरण आहे. दिव्यांग विद्यार्थ्यांमधील न्यूनगंड कमी करण्याचा त्यामागचा उद्देश आहे. दिव्यांग व्यक्तींमधील सुप्त गुणांचा शोध घेऊन त्यांना योग्य दिशा दिली, तर दिव्यांगदेखील समाजाच्या मुख्य प्रवाहात सहजरीत्या मिसळून जाऊ शकतो, असा दृष्टिकोन समाजाने बाळगावा, या उद्देशाने रत्नागिरीतील दिव्यांगांच्या तीन शाळांनी एकत्र येऊन दिव्यांग दिनानिमित्त समावेशित एकता दौड आयोजित केली होती.
एकता दौडीत पन्नास दिव्यांग स्पर्धक आणि सर्वसामान्यांच्या नऊ शाळांमधील पन्नास विद्यार्थी सहभागी झाले. दौड तीन गटांमध्ये झाली. प्रत्येक गटात जेवढे दिव्यांग तेवढेच सर्वसामान्य स्पर्धक असतील, अशी रचना करण्यात आली. स्पर्धकांची खिलाडू वृत्ती, सहकार्याची भावना, आत्मविश्वास, स्वीकारण्याची वृत्ती आणि संवादकौशल्य यांचे निरीक्षण करून प्रत्येक गटातून तीन विजेते निवडण्यात आले.
जिल्हा पोलीस अधीक्षक डॉ. प्रवीण मुंढे यांनी सकाळी सव्वासात वाजता मारुती मंदिर येथे स्पर्धेला हिरवा झेंडा दाखविला. जिल्हा परिषद भवन, माळनाका, एसटी विश्रामगृह आणि परत असे तीन गटांचे मार्ग होते. दौडीचा बक्षीस समारंभ छत्रपती शिवाजी क्रीडांगणावर झाला. प्रत्येक गटात सर्वसामान्य शाळांमधील तीन विजेते, तर दिव्यांग विद्यार्थ्यांमधून एक विशेष विजेता निवडण्यात आला.
स्पर्धेचा निकाल गट पहिला : आदित्य केळकर, गुरुप्रसाद कोतवडेकर (दोघेही जीजीपीएस), सफवान पावस्कर (एम. एस. नाईक हायस्कूल). विशेष विजेता - साई चव्हाण (श्यामराव भिडे कार्यशाळा).
गट दुसरा : अमेय सावंत (जीजीपीएस), तबिश पटेल, मुसद्दिक पठाण (दोघेही एम. डी. नाईक हायस्कूल), विशेष विजेती - मनाली गवंडे (श्यामराव भिडे कार्यशाळा).
गट तिसरा : जियाद मुल्ला, मिमनासिर मस्तान (दोघेही एम. एस. नाईक हायस्कूल), वैदेही चव्हाण (फाटक प्रशाला). विशेष विजेती - श्रावणी रहाटे (सविता कामत विद्यामंदिर).
आविष्कार संस्थेचे अध्यक्ष सीए बिपिन शहा, वीरश्री ट्रस्टचे डॉ. नीलेश शिंदे, जिल्हा समाजकल्याण अधिकारी डॉ. यतीन पुजारी, आविष्कार संस्थेच्या सचिव संपदा जोशी, ‘लायन्स’चे डॉ. शेखर कोवळे, डॉ. तोरल शिंदे, डॉ. शाश्वत शेरे सौ. सुमिता भावे, डॉ. कशेळकर, आंबवलेकर, सौ. वंदना घैसास, श्री. कुरे इत्यादी मान्यवरांच्या हस्ते बक्षीस वितरण करण्यात आले.
स्पर्धेकरिता गोगटे-जोगळेकर महाविद्यालयाच्या एनएसएस ग्रुपचे ५० विद्यार्थी, वीरश्री ट्रस्टच्या माध्यमातून सायकलस्वार, नर्स, प्रथमोपचार पुरविण्यात आले. दौडीला एनएसएस, रोटरी क्लब, लायन्स क्लब, धन्वंतरी हॉस्पिटल, आशादीप, संस्कार भारती इत्यादी संस्थांनी सहकार्य केले.
(एक झलक पाहा सोबतच्या व्हिडिओत. आविष्कार संस्थेविषयी अधिक माहितीसाठी येथे क्लिक करा.)